WhatsApp, səsli mesajları yazıya çevirmə funksiyasını Android platformasında təqdim etdi. Bu xüsusiyyət sayəsində dinləyə bilmədiyiniz səsli mesajların məzmununu yazılı şəkildə görə biləcəksiniz.

WhatsApp, bu funksiyanı əvvəlcə iOS üçün təqdim etmişdi. İndi isə Android istifadəçiləri üçün mərhələli şəkildə istifadəyə verilir. Bu yenilik vasitəsilə dinləyə bilmədiyiniz səsli mesajların məzmunu birbaşa həmin mesajın altında yazılı şəkildə görünəcək.

Səsli mesajlar WhatsApp-da ünsiyyət qurmağın asan yollarından biridir, lakin xüsusilə gurultulu mühitlərdə və ya səssizlik tələb olunan məkanlarda mesajların dinlənməsi problem yaradırdı. Transkripsiya funksiyası ilə bu problem həll olunur. Eyni zamanda, səsli mesajları sevməyən istifadəçilər üçün də bu funksiya böyük rahatlıqdır.

Hazırda bu funksiyanın Azərbaycan dili üçün dəstəyi mövcud deyil

WhatsApp açıqlamasında bildirib ki, səsli mesajların transkripsiyası birbaşa cihazda həyata keçirilir və beləliklə, WhatsApp daxil heç kim mesajlarınıza daxil ola bilmir. Funksiya istifadəyə verildikdə standart olaraq söndürülmüş vəziyyətdə olacaq və onu aktivləşdirmək üçün WhatsApp-ın Söhbətlər  bölməsindən açmaq lazımdır.

Bu funksiya ilkin olaraq İngilis, Portuqal, İspan,  Rus  və Hind dillərində təqdim edilir. Gələcəkdə dəstəklənən dillərin sayı artırılacaq.