Apple CEO-su Tim Cook, süni zəka ilə bağlı son açıqlamalarında, Apple Intelligence -ı "ağıllı telefon inqilabı" ilə müqayisə edərək, bu texnologiya üçün ödəniş etməyi heç vaxt düşünmədiklərini bildirib.
Cook, Wired ilə müsahibəsində, Apple-ın süni zəka sahəsində geridə qaldığı iddialarını rədd edib. O, 2017-ci ildən başlayaraq məhsullara Neural Engine texnologiyasının daxil edildiyini xatırladıb.
Cook qeyd edib ki:
"Biz bunu multitouch kimi görürük – bu texnologiya ağıllı telefon və müasir planşetləri mümkün etdi. Apple Intelligence isə məhsullarımıza yeni bir dövr gətirəcək."
Hazırda iPhone 15 Pro, iPhone 15 Pro Max, iPhone 16 seriyaları və M seriyalı çiplərlə təchiz edilmiş iPad və Mac cihazları daxil olmaqla, bir çox cihazda Apple Intelligence pulsuz təqdim olunur. Şirkət bu platformanı gələcək iOS, iPadOS və macOS yeniləmələri ilə daha da təkmilləşdirəcəyini açıqlayıb.
Buna baxmayaraq, əvvəlki məlumatlarda bəzi Apple Intelligence funksiyalarının 2027-ci ildən etibarən pullu ola biləcəyi bildirilmişdi. Hərçənd Tim Cook bu iddiaları rədd etsə də, bu texnologiyanın gələcəkdə tamamilə pulsuz qalacağına dair qəti təminat verməyib.
