Death Clock adlı süni zəka əsaslı tətbiq, istifadəçilərin həyat tərzini və digər amilləri nəzərə alaraq, onların nə zaman öləcəyini təxmin edir. Bununla yanaşı, tətbiq uzun və sağlam yaşamaq üçün tövsiyələr də verir.

Süni zəka texnologiyasının sürətli inkişafı ilə şəxsi sağlamlıq və ömür gözləntiləri sahəsində yeni həllər yaranır. İyul ayında təqdim edilən "Death Clock" mobil tətbiqi, istifadəçilərə ömür müddətini təxmin edərək diqqət çəkir. Bu tətbiq həyat tərzi və sağlamlıq məlumatları əsasında süni zəka ilə analizlər aparır və nə zaman öləcəyinizi təxmin etməyə çalışır.

Sağlam Həyatı Təşviq Edir

Sensor Tower məlumatlarına əsasən, tətbiq qısa müddət ərzində 125 mindən çox yüklənib. Hal-hazırda bu tətbiq Azərbaycandan birbaşa yüklənə bilmir, lakin VPN və digər alternativ vasitələrlə əldə etmək mümkündür. Tətbiqin adı "qorxuducu" görünsə də, inkişaf etdiricilər bunun məqsədinin sadəcə "ölüm tarixini bildirmək" olmadığını, əksinə istifadəçilərin vərdişlərinin ömür uzunluğuna təsirini anlamaq və sağlam həyat tərzinə keçidi təşviq etmək olduğunu bildirir. Death Clock həm iOS, həm də Android platformalarında mövcuddur.

Tətbiq, 53 milyon iştirakçının məlumatlarını əhatə edən 1.200 fərqli ömür gözləntisi tədqiqatını təhlil edərək dəqiq proqnozlar təqdim edir. İstifadəçilərin qidalanma, məşq, yuxu rejimi və stress səviyyəsi kimi göstəriciləri əsasında analizlər təqdim edir və ənənəvi üsullardan daha dəqiq nəticələr vəd edir.

Yaşam müddəti ilə bağlı bu proqnozlar həm fərdi, həm də ictimai qərarlara ciddi təsir göstərə bilər. Xüsusilə pensiya planlaşdırılması, sığorta və tibbi xərclər sahəsində bu cür məlumatlar əhəmiyyətlidir. Tətbiqin yaradıcılarından Brent Franson, "Bloomberg"ə müsahibəsində, bu məlumatların dəqiqliyinin siyasət və davranışları dəyişə biləcəyini vurğulayır.