Meta, Google və Bing-ə olan asılılığını azaltmaq üçün öz süni zəka dəstəkli axtarış mühərrikini qurur. Şirkətin axtarış mühərriki Meta AI köməkçisinə axtarış nəticələri təqdim edəcək.
Facebook və Instagram-ın ana şirkəti olan Meta, Google və Bing-ə olan asılılığını azaltmaq məqsədilə özünün süni zəka dəstəkli axtarış mühərrikini yaradır. The Information-un verdiyi məlumata görə, şirkətin axtarış mühərriki Meta AI çət-botu ilə söhbət edən şəxslərə cari hadisələr haqqında söhbət formatında cavablar vermək üçün veb-səhifələri skan edəcək.
Meta-nın süni zəka köməkçisi, Facebook, Instagram, WhatsApp və Messenger tətbiqlərində axtarış və mesajlaşma funksiyalarına inteqrasiya olunub. Lakin köməkçi, hazırda veb axtarışları üçün Google və Bing-dən alınan axtarış nəticələrindən istifadə edir.
Meta, yaxın günlərdə Reuters ilə müqavilə imzalayaraq xəbər agentliyinin məzmunlarından yapay zəka sorğularında istifadə etmək hüququnu əldə etmişdi. Şirkət bu addımla, yapay zəka köməkçisinin bacarıqlarını artırmağı və Google və Microsoft-a olan asılılığını azaltmağı hədəfləyir.
