Xiaomi şirkəti oyunculara fokuslanan Redmi K50 Gaming Edition smartfonunu təqdim edib. Black Shark oyuncu smartfon markasını Tencent-ə satan şirkət bundan sonra Redmi ilə gamerlər üçün smartfon istehsal edəcək.

 Şirkətin Black Shark markası əsasən gamerlər üçün smartfonlar istehsal edirdi. Lakin Xiaomi bu markanı Tencent şirkətinə satdı. İndi isə bu rolu Redmi smartfonları üstlənəcək. İlk gamer smartfonu da Redmi K50 Gaming Edition oldu. Bu smartfon 120 Hz-lik Full HD+ Amoled ekran istifadə edir. Gorilla Glass Victus ilə qorunan bu ekran 10-bit rəng keyfiyyətinə malikdir. 64 MP əsas kamerası olan Redmi K50 Gaming smartfonu 8 MP geniş bucaqlı və 2 MP telemakro kameraya malikdir. Həmçinin smartfonun daha az isinməsi üçün gövdə daxilində qrafen soyutma panellərindən istifadə edilib. Beləliklə gamerlər uzun saatlar rahatlıqla oyun oynaya biləcəklər. Smartfonun kənarlarında isə oyunlarda istifadə etmək üçün əlavə düymələr yerləşdirilib. CyberEngine x-axis titrəşmə motorundan istifadə edən bu düymələr oyunlarda istifadəçiləri bir xeyli məmnun edəcək. Redmi K50 Gaming smartfonunun dinamikləri isə məşhur şirkət JBL tərəfindən optimizasiya edilib. Həmçinin Snapdragon 8 Gen 1 prosessoru ilə təchiz edilən smartfon 4700 mAh batareyaya və 120W sürətli şarja malikdir. Smartfonun 18 Fevraldan etibarən satışa çıxması planlanır. Redmi K50 Gaming smartfonunun 8/128 GB versiyası 520 dollara, 12/128 GB versiyası 567 dollara, 12/256 GB versiyası isə 615 dollara satışa çıxacaq.