Xiaomi-nin Samsung kimi Mi 11 smartfonunda tətbiqləri yavaşlatdığı aşkarlanıb

 Xiaomi-nin Mi 11 flaqman smartfonlarında Samsung-un etdiyi kimi tətbiqləri yavaşlatdığı aşkarlanıb. Benchmark platformalarından Xiaomi də bloklana bilər.

 Bir neçə həftə öncə Samsung-un öz flaqman smartfonlarında arxaplanda işləyən GOS servisi ilə 10 mindən çox tətbiqi yavaşlatdığı aşkarlanmışdı. İndi isə eyni şeyin Xiaomi tərəfindən Mi 11 smartfonlarında edildiyi aşkarlanıb. Geekbench platformasını hazırlayan Primate Labs-ın qurucusu John Poole bunu təsdiqləyib. O Geekbench tətbiqinin adını Fortnite və Genshin İmpact olaraq dəyişib. Bunu etdikdən sonra tətbiqi Mi 11 smartfonunda işə salıb. Performans testi zamanı aşkarlanıb ki, Mi 11 də tətbiqləri yavaşladır. Xiaomi Mi 11 smartfonunda istifadə edilən Snapdragon 888-in performans və isinmə problemlərinin olduğu bilinir. Bu səbəbdən istehsalçılar performansı azaldıb smartfonun istifadə edilməsi zamanı ortaya çıxa biləcək problemləri həll etmək istəyirlər. Lakin bu prosesi benchmark tətbiqlərinə tətbiq etməmələri istifadəçiləri aldatdıqlarını göstərir. Mi 11 smartfon seriyası artıq 1 ildir ki, satışdadır. Güman edilir ki, Xiaomi-nin bir çox flaqman seriyasında bu problemlər mövcuddur. Primate Labs bildirib ki, ətraflı araşdırmalar aparıldıqdan sonra media ilə paylaşılacaq.