Windows 11-də Android tətbiqlərini istifadə etmək üçün bəzi tələblər olacaq

 Microsoft şirkəti Windows 11-də Android tətbiqləri istifadə etmək üçün bəzi tələbləri açıqladı. Windows 11 əməliyyat sisteminin ən ciddi yeniliyi hesab edilən Android tətbiqlər üçün dəstək artıq bəzi istifadəçilər üçün aktivləşib.

 Microsoft şirkəti Windows 11 əməliyyat sistemini təqdim edərkən Android tətbiqlərin də istifadə edilə biləcəyini bildirmişdi. Yeni əməliyyat sisteminin ən fərqli və böyük yeniliyi bu hesab edilir. Artıq bəzi istifadəçilər üçün bu funksiyanı aktivləşdirən şirkət Android tətbiqləri istifadə etmək üçün bəzi tələblərin olduğunu bildirib. Microsoft tərəfindən verilən məlumatlara görə Android tətbiqlərin problemsiz işləməsi üçün komputerin 16 GB ram-a malik olması önərilir. Lakin ümumiyyətlə bu funksiyanı istifadə etmək üçün komputerinizdə minimum 8 GB ram olmalıdır. Həmçinin komputerlərdə SSD yaddaş qurğusu olmalıdır. Yəni hard disk istifadə edən istifadəçilər Android tətbiqləri komputerlərinə quraşdıra bilməyəcəklər. Bundan başqa Windows 11 istifadə edən komputerlər minimum 8.nəsil İntel Core i3 və ya AMD Ryzen 3000 seriyasından prosessor istifadə etməlidir. Əks halda Android tətbiqləri istifadə edə bilməyəcəklər. Qeyd edək ki, Fevral ayının ortalarından etibarən Amazon App Store dəstəyi Windows 11-ə gəldi. Beləliklə istifadəçilər bu tətbiq mağazasını istifadə edərək tətbiqləri asanlıqla yükləyə biləcəklər. İndilik sadəcə ABŞ istifadəçiləri üçün aktiv olan bu tətbiq mağazası 1000-ə yaxın tətbiqin yüklənməsini təmin edir. Digər istifadəçilər üçün nə vaxt yayımlanacağı hələki bəlli deyil.