Avropa İttifaqı smartfonlar, planşetlər və digər məişət elektronikası cihazlarında vahid şarj portundan istifadənin məcburiləşdirilməsi istiqamətində daha bir mühüm addım atıb. Avropa Parlamentinin üzvləri Avropa Komissiyasının USB-C-dən mobil cihazların doldurulması üçün vahid standart kimi istifadə edilməsi təklifinə 2-ə qarşı 43 səs verib.
Malta millət vəkili Aleks Agius Saliba mövzu ilə bağlı verdiyi açıqlamada Avropada hər il 11-13 min ton elektron tullantı istehsal edildiyini, cib telefonları və digər kiçik və orta ölçülü elektron cihazlarında tək tip şarj cihazının olmasının hər kəsə fayda verəcəyini bildirib. Hazırda Avropa bazarında üstünlük təşkil edən Android cihazları USB-C-dən, Apple iPhone-lar isə Lightning portundan istifadə edir.Avropa Parlamentinin Daxili Bazar və İstehlakçıların Hüquqlarının Müdafiəsi Komissiyası USB Type-C-nin mobil telefonlarda, planşetlərdə, qulaqlıqlarda, elektron oxuyucularda, klaviaturalar, siçanlar, ağıllı saatlar və elektron oyuncaqlar üçün standart olmasını istəyir. Digər tərəfdən, Apple hesab edir ki, istehlakçıları yeni şarj cihazlarına keçməyə məcbur etmək innovasiyaları sarsıdacaq və çoxlu elektron tullantılar yaradacaq.
