Samsung CEO-su Jong-Hee Han smartfonların bilərək yavaşladılması səbəbilə üzr istəyib. 2022-ci il başlayandan bir çox skandalla üzləşən Samsung şirkəti sonuncu dəfə GOS problemi səbəbilə tənqidə məruz qalmışdı.

 Ötən həftələrdə ortaya çıxan məlumatlara görə Samsung şirkəti Galaxy S22 smartfonlarında istifadə etdiyi GOS (Game Optimizing Service) servisi ilə smartfonlarını yavaşladır. Bu xəbər mediada çox səs küyə səbəb oldu. Bu səbəbdən istifadəçilər Samsung-u bir xeyli qınadılar. Şirkətin səhmdarları ilə keçirilən görüşdə Samsung CEO-su Jong-Hee Han üzr istəyib və bildirib ki, bu halların bir daha olmaması üçün istifadəçiləri diqqətlə dinləyəcək.

 Aşkarlanan məlumatlara görə GOS servisi 10 mindən çox tətbiq və oyuna təsir edir. Samsung iddia edir ki, GOS servisi smartfonun ömrünü uzatmaq, batareyanın daha uzun müddətli enerji saxlaması üçün istifadə edilir. Lakin ortaya çıxdı ki, GOS servisi benchmark performans tətbiqlərində aktivləşdirilmir. Yəni performans testlərində bu proses tətbiq edilmir deyə smartfonlar daha yüksək nəticə göstərir. Bu da istifadəçiləri aldatmaq deməkdir. Samsung hal-hazırda Galaxy S22 smartfonları üçün GOS servisini deaktiv edən bir yenilənmə yayımlayıb. Gözlənilən budur ki, şirkət bu yenilənməni köhnə smartfon modelləri üçün də yayımlayacaq.