Nvidia şirkəti ARM-ı 40 milyard dollara almaqdan imtina edib. 13 Sentyabr 2020-də Nvidia ARM şirkətini 40 milyard dollara alacağını bəyan etmişdi. Beləliklə şirkət ARM-ın bütün texnologiyalarından faydalanmağı planlayırdı. Lakin 2 ildir davam edən alış prosesi uğursuzluqla nəticələnib.

    Bu imtinanın əsas səbəbi Google, Microsoft, Qualcomm kimi ARM ilə işbirliyi edən şirkətlərin etirazları və monopoliyanı izləyən dövlət qurumlarının razılığının olmaması olub. Beləliklə 40 milyard dollarlıq alış prosesi baş tuta bilməyib. FTC kimi monopoliyanı nizamlayan və izləyən qurumlar Nvidia şirkətinin ARM-ı almasına icazə verməyib. Bunun əsas səbəbi olaraq isə ARM kimi texnologiya nəhəngi Nvidia-a satılarsa monopoliyanın ola bilməsidir. Nvidia tərəfindən nizamlayıcı qurumlara verilən sənədlər razılıq üçün yetərli hesab edilməyib. Buna görə də ARM-ın əsas sahibi olan Softbank Group ilə Nvidia şirkəti müqavilənin ləğv edildiyini bildirib. Verilən qərardan sonra Nvidia şirkətinin müqaviləyə əsasən 1.2 milyard dollar təzminat verməsi planlaşdırılıb. ARM şirkətinin rəsmiləri bildirib ki, bu qərardan sonra ARM-ın hissə sənədləri xalqa açıq elan ediləcək və istəyən şəxslər şirkətdən hissə sənədi ala biləcəklər.