Meta yeni süni intellekt modeli olan Llama 4-ü təqdim etdi!

5 Aprel – Dünyanın aparıcı texnologiya şirkətlərindən biri olan Meta Platforms, süni intellekt sahəsində növbəti addımını ataraq ən son versiya olan böyük dil modeli (LLM) – Llama 4 Scout və Llama 4 Maverick-i ictimaiyyətə təqdim etdi.

Meta-nın verdiyi açıqlamaya görə, Llama 4 artıq multimodal süni intellekt sistemi statusuna sahibdir. Bu tip sistemlər mətin, video, şəkil və səs kimi fərqli məlumat növlərini tanıya və onları bir-birinə çevirə bilir. Yəni, bu model müxtəlif formatlar arasında kontentin çevrilməsi funksiyasını yerinə yetirə bilir.

Meta-nın bəyanatında bildirilir ki, Llama 4 Scout və Llama 4 Maverick şirkətin bu günə qədər hazırladığı ən inkişaf etmiş süni intellekt modelləridir və multimodallıq sahəsində öz sinfində ən yaxşılar hesab olunurlar.

Əlavə olaraq, Meta açıqlayıb ki, bu modellər açıq mənbə (open source) proqram təminatı kimi təqdim olunacaq. Şirkət həmçinin Llama 4 Behemoth adlı digər model üzərində işlədiyini bildirib. Bu model "dünyanın ən ağıllı LLM-lərindən biri və Meta-nın bu günə qədərki ən güclü modeli" kimi təqdim edilir. Behemoth, yeni modellərin "müəllimi" kimi istifadə ediləcək.

Qeyd edək ki, son dövrlərdə bir çox böyük texnologiya şirkətləri, OpenAI tərəfindən yaradılan ChatGPT-nin uğurundan sonra süni intellekt sahəsinə milyardlarla dollar sərmayə yatırmağa başlayıblar.

The Information xəbər agentliyinin məlumatına görə, Meta əslində Llama 4-ün təqdimatını gecikdirmişdi. Səbəb isə modelin inkişaf mərhələsində texniki gözləntiləri – xüsusilə məntiq və riyaziyyat testlərində – qarşılamaması olmuşdur.

Eyni zamanda, Meta şirkətini narahat edən digər məsələ Llama 4-ün insan kimi səsli dialoqlar aparmaq baxımından OpenAI-nin modellərindən zəif olması ilə bağlı olub.

Buna baxmayaraq, Meta bu il ərzində süni intellekt infrastrukturunu genişləndirmək üçün təxminən 65 milyard dollar sərmayə qoymağı planlaşdırır. Bu addım, investorların texnoloji nəhənglərdən daha real gəlir gözləməsinə cavab olaraq atılır.

Texnologiyadan xəbərdar olmaq üçün Telsat Xəbərləri izləməyi unutmayın.