Facebook, Instagram və WhatsApp-ın sahibi olan Meta şirkəti yenə cərimələnib. Mark Zuckerberg-ə aid Meta şirkəti istifadəçi məlumatlarının təhlükəsizliyini təmin edə bilmədiyi üçün 17 milyon avro ödəyəcək.

 Köhnə adı ilə Facebook kimi bilinən Meta şirkəti Avropadakı istifadəçilərin məlumatlarının gizliliyini təmin edə bilmədiyi üçün Data Qoruma Komissiyası tərəfindən 17 milyon avro cərimələnib. Bilindiyi üzrə Avropa Birliyi istifadəçilərin məlumatlarını qorumaq üçün GDPR adında bir qanun çıxarıb. Meta şirkəti isə bu 12 məlumat təhlükəsizliyi problemi səbəbilə bu qanunun tələblərini ödəyə bilməyib. Buna görə də cərimələnib. Qeyd edək ki, davam edən araşdırma mərhələsi hələ 2018-ci ildə başlamışdı. 4 il sonra araşdırmaların bitməsi və təsdiqlənməsi səbəbilə Meta şirkəti bu cəzalardan qurtula bilməyib. Daha əvvəl WhatsApp da bu qanunlar səbəbilə 225 milyon avro cərimələndirilmişdi. Həmçinin Twitter-ə də müxtəlif cərimələr tətbiq edən Data Qoruma Komissiyası indi də Instagram-ı araşdırma altına alıb. Beləki əsas şübhələr belədir ki, Instagram platforması uşaqların məlumat gizliliyini təmin etmək üçün heç bir addım atmayıb. Bu səbəbdən güman olunur ki, Instagram da bu cərimələrdən öz payını alacaq.