iPhone SE 4-ün buraxılış tarixi açıqlandı: A16 Bionik ilə gəlir!

Bildiyiniz kimi “Apple”ın iPhone SE 3, iPhone 13 Mini və iPhone 14 Plus kimi orta və aşağı səviyyəli iPhone modelləri ümidləri doğrultmadı. Bu səbəbdən iPhone 15 seriyasından əvvəl bütün gözlərin dördüncü nəsil iPhone SE 4-ə çevrildiyini söyləyə bilərik. Bu gün Barclays analitikləri Blayne Curtis və Tom O'Malley “Apple”ın növbəti orta seqment üçün nəzərdə tutduğu “iPhone”u üçün bəzi lazımlı məlumatlar paylaşıblar.

Xatırlasaq, iPhone SE ilk dəfə 2016-cı ildə təqdim edildi və 2022-ci ilə qədər iki seriyası çıxarıldı. Hal-hazırda mövcud iPhone SE 3 isə 4,7 düymlük LCD ekran, Touch ID, 5G, 12 meqapiksellik arxa kamera və A15 Bionic prosessoru ilə əsas iPhone modellərindən çox fərqli dizaynda satışa təqdim edilmişdi.

Daha əvvəl iPhone SE 4-ün iPhone 14 modeli ilə oxşar dizayna sahib olacağı iddia edilmişdi. Ancaq yeni cihaz 6,1 düymlük OLED ekran, Face ID və Apple A16 Bionic prosessoru kimi yeniliklərlə gələ bilər. Ancaq bu buraxılış tezliklə mümkün olmaya bilər. “Apple”ın tədarük zənciri tərəfdaşlarına görə, şirkətin 2024-cü il üçün iPhone SE 4 üçün planları yoxdur. Beləliklə, cihaz üçün ən erkən buraxılış 2025-ci ildir.