“Apple”ın gələn ay iPhone 15 seriyasını təqdim edəcəyi gözlənilir. 2023 iPhone modellərində Lightning bağlantısı əvəzinə USB-C portunun olacağı bildirilir. ChargerLAB-in məlumatına görə, yeni “iPhone”lar Thunderbolt texnologiyasını dəstəkləyəcək. Bu, daha sürətli məlumat ötürülməsi deməkdir.

Sızdırılan iPhone 15 komponentləri arasında Retimer çipi çox vacibdir. Çünki bu çip Thunderbolt cihazlarında siqnalları bərpa etmək və siqnal titrəməsini azaltmaq üçün istifadə olunur. iPhone 15 USB-C portu üzərindən daha yüksək sürətlə məlumatları ötürə biləcək. Müqayisə üçün qeyd edək ki, Lightning konnektoru USB 2.0 üzərindən 480 Mbit/s-ə qədər sürət təklif edir, USB-C konnektoru 5Gbps ilə 10Gbps arasında məlumat ötürür. Thunderbolt-a gəldikdə məlumat ötürmə sürətləri 40Gbps-ə qədər yüksəlir. Bu o deməkdir ki, istifadəçilər adətən ProRes videoları kimi kompüterə ötürülməsi uzun vaxt aparan məlumatları daha sürətli ötürə bilərlər. Bu texnologiya enerji müddətinə də öz töhfəsini verəcək.

Thunderbolt dəstəyinin bütün iPhone 15-lərdə və ya yalnız Pro seriyalarında olacağı hələ aydın deyil. Çox güman ki, bu, iPhone 15 Pro və 15 Pro Max üçün eksklüziv xüsusiyyət olacaq.