Google şirkəti bir yenilik edərək Pixel 6 smartfon seriyasını Google Tensor adını verdiyi yeni prosessor ilə təchiz etmişdi. Süni Zəka tərəfində güclü olan smartfon seriyasının növbəti modeli Pixel 6a modeli May ayında təqdim edilə bilər.

        Pixel 6 smartfonları ilə Tensor prosessorunu təqdim edən Google bir çox istifadəçi tərəfindən tənqid edilmişdi. Bu tənqidin əsas səbəbi isə yeni Tensor prosessorunun rəqiblərindən geri qalması idi. Lakin şirkət yeni prosessorunun performans olaraq geri qalsa da süni zəka proseslərində güclü olduğunu iddia edirdi. Google-un öz prosessorunu hazırlamasına əsas səbəb isə rəqib prosessorların baha olması və bu səbəbdən smartfon qiymətinin artması idi. Samsung ilə iş birliyi əsasında hazırlanan Tensor prosessorları Google-a smartfonların daha sərfəli qiymətə satılmasına kömək edir.

    İndi isə Alman analitik Max Jambor tərəfindən paylaşılan məlumatlara əsasən Pixel 6a smartfonu da Google Tensor prosessoru ilə təchiz ediləcək. Bundan başqa FRONT PAGE TECH youtube kanalının sahibi Jon Prosser də Pixel 6a modelinin 26 May tarixində təqdim ediləcəyini bildirmişdi. Bluejay kod adlı yeni smartfon Pixel 6 modelindən qismən zəif olacaq. Smartfonun 6.2 düym OLED ekrana, 8 GB rama və 128 GB daxili yaddaşa malik olması gözlənilir. Prosessor tərəfində isə Google Tensor istifadə ediləcək. Pixel 6a smartfonunun 12.2 MP əsas kamera və 12 MP geniş bucaqlı kamera ilə təchiz ediləcəyi bildirilir. Ön kamera olaraq isə 8 MP-lik sensor istifadə ediləcək. Kamera sensorları kağız üzərində zəif görünsə də Google tərəfindən optimizasiya edildiyi üçün rəqiblərindən geri qalmayacağı düşünülür. Bilindiyi kimi Google xüsusi alqoritmalar vasitəsilə öz kamera tətbiqini tez-tez yeniləyir və bunun nəticəsində də Pixel smartfonları daha real, daha kəskin və daha yaxşı şəkillər çəkə bilir. Qeyd edək ki, Pixel 6a smartfonu Android 12 istifadə edəcək. Smartfonun satış qiymətinin 400-450 dollar arası olacağı bildirilir.