Apple-ın yeni əməliyyat sistemi ortaya çıxdı: realityOS

  Apple şirkətinin bir müddətdir üzərində işlədiyi realityOS əməliyyat sistemi ortaya çıxdı. GitHub və AppStore platformalarında yeni əməliyyat sistemi ilə bağlı referanslar aşkarlanıb. Ortaya çıxan məlumatlara görə yeni əməliyyat sistemi virtual gerçəklik proyektləri üçün istifadə olunacaq.

  Yeni əməliyyat sisteminin məlumatları GitHub açıq qaynaq kodlarında və App Store platformasında aşkarlanıb. realityOS olaraq adlandırılması gözlənilən əməliyyat sistemin hansı funksiyalara malik olacağı hələki bilinmir. Lakin şirkətin digər platformaları ilə uyğun işləyə biləcəyi düşünülür. Beləliklə tərtibatçılar oyun və proqramlarını asanlıqla virtual gerçəklik platformasına adaptasiya edə biləcəklər. Həmçinin Apple şirkətinin bir sonrakı məhsulun AR/VR başlıqlar olması gözlənilir. Lakin bir neçə ildir haqqında danışılan cihazlar satışa çıxa bilməyib. Təxminlərə görə şirkət rəqabətdə önə çıxa biləcək cihazlar üzərində işləyir. Ona görə də AR/VR başlıqların təqdimatı uzun çəkib. Bir digər məlumat isə odur ki, 2023-cü ildə şirkət bu cihazlarını təqdim edəcək və bu ekosistemə rəsmi olaraq giriş edəcək.

  Qeyd edək ki, Metaverse proyektlərinin artdığı və şirkətlərin bura investisiya etdiyini nəzərə alsaq AR/VR ekosisteminə olan tələb artacaq. Bu səbəbdən bir çox şirkət bu ekosistemdə öz yerini almağa çalışır. Apple şirkətinin də bunlardan biri olması təəccüblü olmaz. Bundan başqa Meta, Microsoft, Google şirkətləri də bir çox yeni proyekt üzərində çalışır. Yaxın zamanlarda Galaxy S22 smartfon seriyasını təqdim edən Samsung da Metaverse dünyasında ayrı bir təqdimat keçirərək bu ekosistemdə olduğu bildirmişdi.