Apple iPhone SE 3-ün çıxış tarixi sızdırıldı

  Maraqla gözlənilən Apple iPhone SE 3 smartfonunun çıxış tarixi sızdırıldı. Daha əvvəl render şəkilləri paylaşılan və istehsala başlandığı iddia olunan iPhone SE 2022-nin çıxış tarixi haqqında məlumatlar paylaşılıb. Apple şirkətinin ən ucuz 5G dəstəkli smartfonu 8 Mart tarixində təqdim oluna bilər.

  Bloomberg editoru olan Mark Gurman məlumat verib ki, Apple-a yaxın mənbələrin iddiasına görə iPhone SE 2022 modeli 8 mart və ya bənzər tarixlərdə təqdim oluna bilər. Gurman bildirir ki, 2022-ci il Apple şirkətinin ən çox smartfon təqdim etdiyi il olacaq. Bundan başqa 8 Mart tarixində iPhone SE 3 ilə yanaşı yeni iPad Air 5 və Apple Silicon prosessoru ilə təchiz olunmuş yeni Mac Mini modelləri də təqdim oluna bilər.  iPhone SE 2022 smartfonunun dizayn olaraq iPhone XR-a bənzəyəcəyi iddia edilir. Həmçinin smartfon 5G dəstəyinə, daha yaxşı kameraya və A15 Bionic prosessoruna malik olacaq.