Apple çox gözlənilən smartfonunu təqdim etdi: iPhone SE 3

 Apple şirkəti çox gözlənilən ən ucuz 5G smartfonu iPhone SE 3 modelini təqdim edib. 8 Mart tarixində keçirilən təqdimatda uzun müddətdir haqqında danışılan model istifadəçilərə göstərilib. iPhone SE 3 şirkətin ən ucuz 5G-li smartfonu ünvanını daşıyır.

 Apple şirkəti Peek Performance tədbirində yenilənmiş iPhone SE 3 smartfonunu nəhayət ki, göstərdi. Cupertinolu şirkət bu modeldə də iPhone SE (2020) smartfonunun dizaynından istifadə edib. Yəni qalın çərçivələr və TouchİD funksiyasını yerinə yetirən fiziki düymə mövcuddur. Bu da istifadəçilər tərəfindən biraz tənqid edildi. Çünki gözləntilər yeni dizayn ilə təqdim ediləcəyi istiqamətində idi. iPhone SE 3 modelinin arxa və ön tərəfində istifadə edilən qoruyucu şüşə iPhone 13 modelindəki ilə eynidir. Bu da smartfonlardakı ən möhkəm qoruyucu şüşə hesab edilir. IP67 sertifikatı olan smartfon suya və toza qarşı dayanıqlıdır. Bu smartfonda 4.7 düym İPS texnologiyasına malik olan LCD ekran istifadə edilib. Retina HD panel, 326 ppi piksel dərəcəsi və 1334x750 piksel ölçülərinə malikdir. iPhone SE 3 modelinin ekranının maksimum parlaqlığı 625 nit olaraq bildirilib.

 iPhone SE 3 smartfonu A15 Bionic çipi ilə gücləndirilib. Qeyd edək ki, bu çip iPhone 13 modellərində də istifadə olunur. Smartfonun bir digər özəlliyi 5G şəbəkə dəstəyinin olmasıdır. Həmçinin Qİ sürətli şarj texnologiyasını dəstəkləyən cihaz daha uzun ömürlü batareyaya malikdir. Kamera tərəfində isə 12 MP f/1.8 diafraqmalı sensoru olan smartfon bir çox kamera funksiyasına malikdir. iPhone SE 3 modeli 64/128/256 GB olmaqla 3 versiyada satışa çıxacaq və satış qiyməti 429 dollardan başlayacaq.