iPhone SE 3 modeli 5G şəbəkələrdə zəif performans göstərəcək

 Apple şirkəti 5G dəstəkli iPhone SE 3 modelini təqdim etmişdi. Şirkət bildirir ki, Apple-ın ən ucuz 5G-li smartfonu bu modeldir. İndi isə bunun səbəbi bəlli olub.

 8 Mart tarixində keçirilən təqdimatda iPhone məhsul qrupu rəhbəri Francesca Sweet “5G-ni ən ucuz qiymətli iPhone-muza gətiririk” demişdi. Amma görünən odur ki, iPhone SE 3 modelində olan 5G texnologiyası iPhone 12 və iPhone 13-ə nəzərən çox yavaşdır. Bunun səbəbi isə smartfonda daha ucuz 5G modeminin istifadə edilməsidir. iPhone SE 3-ün texniki parametrlərinə baxdığımızda görürük ki, 2x2 MİMO funksiyalı Sub-6 Ghz tezliklərində işləyən 5G modemi istifadə edir. Lakin iPhone 13 seriyasında ən sürətli 5G olan mmWave modem istifadə edilib. Bu səbəbdən iPhone SE 3 modelləri 5G şəbəkələrində flaqman smartfonlar qədər yüksək sürətli internet vəd etməyəcək. Smartfonun “büdcə dostu” bir model olduğunu nəzərə alsaq istifadəçilər bundan şikayətçi olmayacaqdır.