Apple iPhone 14 Pro yeni kamera sensoruna görə daha qalın olacaq

 Apple-ın növbəti modeli iPhone 14 Pro yeni 48 MP-lik kamera sensoruna görə daha qalın olacaq. Şirkət iPhone 6s-dən bu yana ilk dəfə radikal kamera dəyişikliyi edəcək.

 Son məlumatlara görə iPhone 14 Pro və Pro Max modelləri əvvəlki nəslə görə daha qalın olacaq. Bunun əsas səbəbi yeni 48 MP-lik kamera sensorunun istifadə edilməsidir. Analitik Ming-Chi Kuo bildirib ki, Apple şirkəti yüksək keyfiyyətli kamera sensoru istifadə edəcək deyə smartfonun qalınlaşması məcburi bir vəziyyətdir. Yeni 48 MP-lik kamera Apple-ın illərdir istifadə etdiyi 12 MP-lik kameranın yerini alacaq. Bu səbəblə kamera bloku da 5-10% böyüyəcək. İddialar budur ki, yeni kameralar iPhone 14 Pro və Pro Max modellərini bu ilin ən yaxşı şəkil çəkən smartfonu edə bilər. Qeyd edək ki, daha böyük sensorlu kameranın istifadə edilməsi smartfonun daha işıqlı, daha keyfiyyətli şəkil çəkməsinə imkan yaradır. Bundan başqa yeni kamera sensoru səbəbilə artıq iPhone ailəsi 8K videolar da çəkə biləcək. iPhone 14 Pro və Pro Max modelləri Apple-ın yeni A16 Bionic çipsetindən güc alacaq və artıq ekranın üzərində çərtik əvəzinə iki dəlik olacaq.