Hazırlanma mərhələsində olan Android 13-ün oyunçuları sevindirəcək yeni xüsusiyyəti kəşf edilib. Belə ki, yeni hesabata görə, Google Android 13 ilə bəzi oyun yönümlü təkmilləşdirmələr etməyi planlaşdırır.

 Android 13 ilə setGameState metodu əməliyyat sisteminə əlavə olunacaq ki, bu da oyunlara cari statusları barədə telefona məlumat verməyə imkan verəcək. Bu sayədə oyunların cari vəziyyətini öyrənən telefon oyun performansının azalıb azalmadığına qərar verə biləcək. Bundan əlavə, setGameState metodu sayəsində oyunların yükləmə müddətləri toplanacaq. Bu məlumata görə, telefon daha sonra oyun təcrübəsini növbəti səviyyəyə keçirmək üçün GAME_LOADING rejimindən istifadə edərək CPU performansını artıra biləcək.

 Sözügedən xüsusiyyətin yalnız Android 13 ilə gələn telefonlarda işləyəcəyi bildirilir. Başqa sözlə, bu funksiyanın Android 12 və əvvəlki versiyalardan Android 13-ə yüksəldilmiş cihazlarda işləməsi gözlənilmir. Əslində, əksər istehsalçıların oyun performansını və yükləmə müddətlərini artırmaq üçün proqram təminatı ilə telefonun çipinə müdaxilə edən müxtəlif üsullar var və bunu oyun rejimində istifadəçilərinə təklif edirlər. Ancaq bu xüsusiyyətin əməliyyat sisteminə daxil edilməsi, funksiyanın daha bir çox telefonda yer alacağı anlamına gəlir.