Ağıllı saat bazarının aparıcı adlarından biri olan Samsung bu sahədə yenilikçi ideyalar təqdim etməyə davam edir. Cənubi Koreya nəhəngi indi proyektorlu Galaxy Watch üçün ABŞ Patent və Ticarət Nişanları İdarəsinə müraciət edib. Yeni dizayn ağıllı saatların istifadə sahəsini genişləndirə bilər. Patent müraciətinə əsasən, Samsung saat qayışına yerləşdirilmiş proyektor vasitəsilə şəkillərin əl səthinə proyeksiya edilməsinə icazə verəcək. Bunun davamlı olaraq yolda olan istifadəçilər üçün asan və praktik olacağını söyləyə bilərik. Patent həmçinin göstərir ki, proyeksiya edilən təsvirin fokus və bucağı saatdakı bir sıra sensorların köməyi ilə avtomatik olaraq dəyişə bilir. Bununla belə, şəklin düzgün təqdim edilməsi üçün biləyinizi düz tutmağınız lazım ola bilər.

Yeni patentlə Samsung ağıllı saatlara fərqli funksiyalar da gətirə bilər. Çünki patent faylında şirkət qeyd edir ki, “proyeksiya ekranında göstərilən məlumat displey modulunda göstəriləndən fərqli ola bilər”. Bu kontekstdə yeni saatı videozəng və digər funksiyalar üçün istifadə etmək olar.

Bu gün bir çox texnologiya nəhəngləri gələcək planlarına uyğun yeni patentlər üçün müraciət edirlər. Bununla belə, bir çox ideya elə sənədlərdə qalır. Yeni patentin Galaxy Watch modellərində istifadə edilib-edilməyəcəyi hələ məlum deyil. Bunu görmək üçün bir az daha gözləməliyik.