Xiaomi smartfon və ya notbuklara yerləşdirilə biləcək yalan detektorunu patentləşdirib. Bu məlumat Çin mətbuatına çıxan maraqlı patent sənədi sayəsində ortaya çıxdı.

Patent təfərrüatları açıqlanıb

Məlumdur ki, yalan danışan insanın ürəyi daha tez döyünür, gözlərini tez-tez qırpır, göz bəbəkləri genişlənir. Xiaomi tərəfindən patentləşdirilmiş texnologiya bu parametrlərin son ikisindən istifadə edəcək. Başqa sözlə desək, sistem qarşıdakı insanın gözünə fokuslanacaq. Şirkət istifadəçinin üzünü və göz bəbəklərini izləyən telefoto obyektivli xüsusi kamera hazırlayacaq. Kameraya inteqrasiya olunmuş alqoritmlər insanın davranışını izləyəcək. Tutaq ki, əgər cavab zamanı göz bəbəyi orijinal ölçüsünün 4-8%-i qədər genişlənirsə və ya iştirakçı 8 dəfə daha çox göz qırpmağa başlayırsa, bu onun yalan danışdığını göstərəcək.

Kameranın süni intellekti bəbəyin genişlənməsinin stressdən, yoxsa yalandan qaynaqlandığını müəyyən edə biləcək. “Xiaomi”nin patenti artıq təsdiqlənib, lakin şirkətin texnologiyadan hansı cihazlarda istifadə etmək niyyətində olduğu bəlli deyil. Şirkət həmçinin yalan detektorunu ayrıca məhsul kimi də istifadəyə verə bilər.