Xiaomi tezliklə yeni ağıllı qolbağını təqdim edəcək. Gələn həftə satışa çıxarılacaq Mi Band 8-in xüsusiyyətləri açıqlanıb. Çox maraqlı yenilik var: Ağıllı qolbaq boyunbağıya çevrilə biləcək. Mi Band 8-dən boyunbağı kimi istifadə etmək yeni kəmər sistemi sayəsində mümkün olacaq. Cihazın gövdəsində birləşdirmək üçün xüsusi yuvalar var. Bilərziyi boyunbağıya çevirmək üçün Mi Band 8-in bir tərəfinə uzun zəncir taxmaq və digər tərəfi boş qoymaq kifayətdir.

Şübhəsiz ki, Mi Band 8 boyunbağıya çevrildiyi zaman ürək döyüntüsünün ölçülməsi, qandakı oksigen miqdarının təyin edilməsi kimi bəzi funksiyalar istifadə oluna bilməyəcək. Çin nəhəngi bildirir ki, boyunbağı formatı saatın nümayişi, addımların sayılması və alışların ödənilməsi üçün daha uyğun olacaq (NFC çipi də gözlənilir).

Bu yaxınlarda elan edilmişdi ki, Xiaomi Mi Band 8 kamera mərkəzli flaqman Xiaomi 13 Ultra və Xiaomi Pad 6 planşetləri ilə birlikdə 18 aprel 2023-cü ildə təqdim ediləcək. Bundan əlavə, ağıllı qolbağın dizaynını ortaya qoyan tanıtım fotoları da buraxılıb.