Xiaomi fevralın 26-da flaqman Xiaomi 13 seriyasının qlobal təqdimatını edəcək. Sözügedən tədbirdə şirkət Xiaomi 13 və 13 Pro modellərini beynəlxalq arenaya çıxarmaqla yanaşı, Xiaomi 13 Lite modelini də bazara təqdim edəcək. Yadınızdadırsa, Xiaomi 13 və 13 Pro ötən ilin dekabrında Çində təqdim edilmişdi. Xiaomi 13 Lite artıq Çində satışda olan Xiaomi CIVI 2-nin qlobal versiyası olaraq gələcək. Smartfonun dizaynını əks etdirən fotolar yayılıb.

Xiaomi 13 Lite əyri kənarları, FHD+ həlli və 120 Hz yeniləmə tezliyi olan 6,55 düymlük AMOLED displey daşıyacaq. Snapdragon 7 Gen 1 prosessoru ilə təchiz ediləcəyi gözlənilən smartfon 12 GB-a qədər RAM və 256 GB-a qədər daxili yaddaşla təklif ediləcək.

Bundan əlavə, 67 vatt sürətli enerji doldurma dəstəyi ilə 4500 mAh batareya, 50 meqapiksellik əsas sensoru olan üçlü arxa kamera sistemi və 32 meqapiksellik ikili ön kamera da müzakirə edilir. Smartfonun qiymət etiketini 26 fevralda birlikdə öyrənəcəyik.