Twitter Türkiyədə saatlar sonra yenidən açılıb!

Türkiyədə həm zəlzələ koordinasiyası, həm də kommunikasiya üçün kritik əhəmiyyət kəsb edən Twitter dünən saat 16:30-dan gecəyarısına kimi bağlı olub. Bundan sonra Nəqliyyat və İnfrastruktur Nazirliyi ilə Twitter arasında görüş olub.

Twitter yenidən açılıb

Nəqliyyat və İnfrastruktur Nazirinin müavini Ömər Fatih Sayanın Twitter rəhbərliyi ilə keçirdiyi görüşdə “Twitter”in dezinformasiya ilə mübarizədə Türkiyə ilə daha çox əməkdaşlıq etmək öhdəliyi götürdüyü öyrənilib. Ömər Fatih Sayan Cüneyt Özdəmirə verdiyi açıqlamada Twitter ilə razılaşma əldə edildiyini və Twitterə girişin açıldığını bildirib.

Twitter saxta xəbərlər, dezinformasiyalar və saxta hesablarla bağlı Türkiyə ilə əməkdaşlıq etməyə razılaşıb. Twitter 5651 saylı qanun çərçivəsində şəxsi hüquqları və ictimai asayişi pozan, can və mal təhlükəsizliyini təhlükə altına alan tvitlərə qarşı atılacaq addımlarla bağlı daha həssas olacağını bildirib. Elon Musk "Daha çox öyrənmək üçün çalışırıq" açıqlamasını verib.

Xatırladaq ki, “Twitter”ə tətbiq edilən giriş qadağası ciddi etirazlara səbəb olmuşdu.