TikTok məzmunları süni intellektlə idarə edəcək

Sosial media platforması TikTok, məzmun moderasiyasında süni intellektin daha çox istifadəsinə yönəldiyi üçün yüzlərlə işçisini işdən çıxarır.

Dünyanın ən böyük xəbər agentliklərindən biri olan Reuters, TikTok-un məzmun moderasiyası ilə bağlı ən azı 700 işçini işdən çıxardığını bildirib. İşdən çıxarılan işçilərin yerini süni intellekt tutacaq.

Reuters-in yaydığı məlumata görə, Malayziyada 700-dən çox şəxs işdən çıxarılıb. TikTok-un mətbuat xidməti isə işdən çıxarılmaları təsdiqləyib, lakin 500 nəfərin işinə son verildiyini açıqlayıb. İşdən çıxarılmalarla bağlı heç bir səbəb göstərilməyib.

TikTok-un 110.000-dən çox işçisi var

Bununla yanaşı, TikTok-dakı moderasiya sisteminin idarəçiliyi, moderasiya prosesində insan moderatörlərin süni intellekt ilə əvəz edilməsinə üstünlük verir. Şirkətin veb saytına görə, ByteDance dünya üzrə 200-dən çox şəhərdə 110.000-dən artıq işçiyə sahibdir və şirkət hazırda platformadakı məzmunun 80%-nin avtomatlaşdırılmış texnologiyalar tərəfindən silindiyini qeyd edir.

TikTok sözçüsü isə bu mövzu ilə bağlı açıqlamasında: "Bu dəyişiklikləri, məzmun moderasiyası üçün qlobal əməliyyat modelimizi daha da gücləndirmək istiqamətində davam edən səylərimizin bir hissəsi olaraq həyata keçiririk." ifadəsini istifadə edib.