İrlandiya tənzimləyiciləri TikTok-u uşaqların məxfiliyini pozduğuna görə 345 milyon avro (296 milyon funt sterlinq) cərimələyib.

Şikayət sosial media tətbiqinin 2020-ci ildə uşaqların məlumatlarını necə idarə etdiyi, xüsusən də yaşın yoxlanılması və məxfilik parametrləri ilə bağlı idi. Bu, TikTok-un tənzimləyicilərdən bu günə qədər aldığı ən böyük cərimədir. Sosial media firmasının sözçüsü, “qərarla, xüsusən də tətbiq edilən cərimənin səviyyəsi ilə razı olmadığını" söylədi: “Qeyd etdiyiniz araşdırmalar 3 il əvvələ aiddir. Və bütün problemlər məhz 3 illik müddət ərzində müxtəlif yeniləmələrlə aradan qaldırıldı.

Cəza İrlandiya Məlumatların Mühafizəsi Komissiyası (DPC) tərəfindən Aİ-nin Ümumi Məlumatların Qorunması Qaydası (GDPR) məxfilik qanununa uyğun olaraq tətbiq edilib. GDPR şirkətlərin məlumatları emal edərkən əməl etməli olduğu qaydaları müəyyən edir. DPC, TikTok-un məxfilik parametrləri ilə bağlı uşaqlar üçün kifayət qədər şəffaf olmadığını aşkar etdi və onların məlumatlarının necə işləndiyi ilə bağlı suallar qaldırdı.

Şirkətə məlumat emalını GDPR ilə tam uyğunlaşdırmaq üçün üç ay vaxt verildi.

London İqtisadiyyat və Siyasi Elmlər Məktəbində uşaqların rəqəmsal hüquqları və təcrübələrini araşdıran professor Sonia Livinqston DPC-nin qərarını alqışlayıb: "[Uşaqlar] istismara məruz qalmadan və ya manipulyasiya edilmədən rəqəmsal dünyada iştirak etmək istəyir. Bu o deməkdir ki, platformalar məlumatlarının necə işləndiyini açıqlamalı və ən əsası, onların məlumatlarına ədalətli davranmalıdırlar, çünki məxfilik uşağın hüququdur".
 

TikTok-un AB-dən Çinə qeyri-qanuni məlumat ötürməsi ilə bağlı araşdırma davam edir. TikTok Pekində yerləşən ByteDance şirkətinə məxsusdur.