Səbrsizliklə gözlənilən Galaxy Z Fold 5 və Flip 5 iyulda satışa çıxır!

Ötən həftə flaqman Galaxy S23 ailəsini istifadəçilərə təqdim edən Samsung ilin ikinci Unpacked tədbiri üçün hazırlıqlarını davam etdirir. Bu tədbirdə bizi bir çox yeni təqdimatlar, o cümlədən Galaxy Z Fold 5, Flip 5, Watch 6 və Tab S9 gözləyir. Son yayılan xəbərlər qarşıdan gələn Unpacked tədbirinin tarixini sızdırdı.

“Samsung”un növbəti böyük Unpacked təqdimat tədbiri iyulun son həftəsində baş tutacaq. Bu da təxminən 25, 26 və ya 27 iyula işarə edir. Tədbirin tarixinin niyə qabağa salındığı isə bilinmir.

Əslində istehlak bazarındakı rəqabəti nəzərə alsaq, yeni qərar təəccüblü deyil. Çünki Galaxy Z seriyası ilə yüksəlməyə başlayan qatlana bilən telefon yarışına Oppo Find N2, Vivo X Flip və Pixel Fold daxil olmaqla bir çox yeni rəqib qatıldı. Buna görə də Samsung Galaxy Z Fold 5 və Flip 5 ilə bağlı işləri sürətləndirə bilər. Onu da qeyd edək ki, bu yeni təqdimat tarixi hələ rəsmi deyil. Dəqiq vaxtı üçün bir az daha gözləməliyik.