Saxta Papa və Trampın şəkillərinə görə "Midjourney"dən istifadə dayandırıldı!

Mətn daxiletmələrindən şəkillər yaradan süni intellekt vasitəsi Midjourney sui-istifadə ilə mübarizə aparır. Midjourney böyük irəliləyiş əldə etmişdi və realdan demək olar ki, fərqlənməyən vizuallar yaratmağa başlamışdı. İnsanlar bu yüksək keyfiyyətdən istifadə edərək "deepfakes" dediyimiz saxta şəkillər yaratmağa başladılar. Buna görə də “Midjourney”in pulsuz versiyası ləğv edildi. CEO David Holz Discord-da şirkətin "fövqəladə tələb və sui-istifadə" səbəbi ilə pulsuz versiyanı dayandırdıqlarını bildirdi. Holz əlavə etdi ki, mövcud qaydalar sui-istifadənin qarşısını almaq üçün kifayət deyil. Hələlik "Midjourney"dən istifadə etmək üçün ayda ən azı 10 dollar ödəməli olacaqsınız. 

Midjourney son həftələrdə arzuolunmaz formada diqqət mərkəzindədir. Belə ki istifadəçilər həbs olunan Donald Tramp və dəbli  palto geymiş Roma Papası Fransisin saxta şəkillərini hazırlayıb. Diqqətli baxılanda fotonun saxta olduğu başa düşülsə də, Papa obrazı kütlə tərəfindən real kimi qəbul edilib. Görünən budur ki, Midjourney, OpenAI-nin DALL-E və oxşar görüntü yaradan süni intellekt vasitələri daha çox dezinformasiya yaymaq üçün istifadə olunur.

Holz istifadəçilərlə söhbətində süni intellektin əvvəlkindən daha real şəkillər yaratdığı üçün insanların onların saxta olduğunu müəyyən etməkdə çətinlik çəkdiyini bildirib. CEO, həmçinin “Midjourney”dən sui-istifadəni aşkar edən AI auditoru hazırlamağa ümid etdiklərini deyib.