Samsung telefonlara hava şəraitinə uyğun dəyişən fon şəkilləri gələ bilər

Samsung, süni intellekt dəstəyi ilə hava şəraiti və günün vaxtına görə dəyişən fon şəkilləri ilə bağlı patent qeydiyyatından keçib.

Samsung smartfon istifadəçiləri üçün yaxın zamanda dinamik fon şəkilləri  funksiyasını təqdim edə bilər. Şirkətin ABŞ-da qeydiyyatdan keçirdiyi yeni patent, hava şəraiti və zaman aralığına uyğun avtomatik dəyişən fon şəkillərini əhatə edir.

Patentdə təqdim edilən illüstrasiyalar göstərir ki, günün fərqli saatlarında və müxtəlif hava şəraitlərində ekran fonları avtomatik dəyişə bilər. Məsələn, bir mənzərə fotosu yağışlı hava zamanı buludlu və nəmli atmosferi əks etdirəcək şəkildə yenilənə bilər. Hətta istifadəçilərə çətir götürməyi tövsiyə edən bildirişlərin də əlavə olunması nəzərdə tutulur.

Yaradıcı süni intellekt istifadəsi

Samsung, hava şəraiti və günün saatına uyğun şəkilləri dəyişmək üçün yaradıcı süni intellektdən istifadə edəcək. Bundan əlavə, süni intellekt vasitəsilə şəkillərə müxtəlif vizual qatlar əlavə etmək mümkündür. Hal-hazırda patent mərhələsində olan bu maraqlı konseptin nə vaxt reallaşacağı isə hələlik məlum deyil.