Samsung incə Galaxy S25 Edge modelini təqdim etdi

Samsung, Galaxy Unpacked tədbirinin sonunda böyük bir sürpriz edərək Galaxy S25 Edge modelini təqdim etdi. Daha əvvəl Galaxy S25 Slim olaraq tanınan bu modelin dizaynı ilk dəfə ortaya çıxdı.

Şirkət, telefonla bağlı ətraflı məlumat paylaşmasa da, qısa bir tanıtım videosu və cihazın incəliyini vurğulayan bir görüntü yayımladı. Daha sonra telefona aid digər fotolar da üzə çıxdı.

Samsung Galaxy S25 Edge hansı xüsusiyyətlərə sahib olacaq?

Galaxy S25 Edge, indiyə qədər Galaxy S25 Slim adı ilə tanınan modelin rəsmi adı olacaq. Görüntülərdən göründüyü kimi, bu modeldə iki kamera olacaq. Telefonun incə gövdəsi səbəbindən böyük bir kamera çıxıntısı olduğu diqqət çəkir. Kamera modulunun dizaynı isə seriyanın digər modellərindən xeyli fərqli olacaq.

Mövcud məlumata əsasən, Galaxy S25 Edge, cəmi 6,4 mm qalınlığında çox incə bir gövdəyə malik olacaq. 6,7 düymlük ekran, Snapdragon 8 Elite çipseti və 200 MP ana kamera ilə gəlməsi gözlənilən bu modelin təqdimat tarixi olaraq may ayı göstərilir.