Cənubi Koreyanın texnologiya nəhəngi Samsung şirkəti Galaxy F54 adlı orta büdcəli smartfon buraxmağa hazırlaşır. Tezliklə satışa çıxarılacağı gözlənilən cihazın render görüntüləri internetə düşüb. Yayımlanan şəkillər onun dizayn baxımından mart ayında təqdim edilən Galaxy A54-ə bənzəyəcəyini göstərir. Sözügedən telefonların bəzi xüsusiyyətləri oxşar olsa da, aralarında bir sıra mühüm fərqlər var. Galaxy F54-ün 6000 mAh batareya ilə gələcəyi deyilir. Bildiyiniz kimi, A54 5000 mAh tutumlu akkumulyatora malikdir. Bundan əlavə, kamera konfiqurasiyasında dəyişikliklər var.

Bildirilir ki, yeni model 108 meqapiksellik əsas kamera ilə gələcək. Galaxy A54-də isə 50 meqapiksellik əsas sensordan istifadə edilib. Galaxy F54 Exynos 1380 çipseti ilə təchiz ediləcək. Cihazda Full HD+ təsvir ölçülü 6,7 düymlük AMOLED displey görəcəyik. Smartfonun iki rəng variantında təklif ediləcəyi gözlənilir: Göy və gümüş. Bütün bunlara əlavə olaraq 750 manat (435 dollardan) başlanğıc qiymətinin olacağı da xəbərlər arasındadır.