Samsung-un maraqla gözlənilən telefonları Galaxy A16 5G və Galaxy A16 4G-nin satış qiymətləri açıqlandı. Keçən ilki modelin qiymətləri qorunacaq. Ətraflı məlumatlar belədir…

Bildiyiniz kimi, Samsung Galaxy A seriyası ən populyar Android orta seqment cihazlar arasında yer alır. Hazırda Samsung, sərfəli qiymətə təqdim ediləcək Galaxy A16 5G və Galaxy A16 4G modellərini elan etməyə hazırlaşır. Keçən ilki Galaxy A15 modelini əvəz edəcək bu yeni telefonlar daha öncə Geekbench və FCC verilənlər bazasında görünmüşdü. Son saatlarda isə Galaxy A16 5G və A16 4G qiymətləri açıqlandı.

Samsung Galaxy A16 5G və A16 4G qiymətləri açıqlandı

Pərakəndə satış kanallarından sızdırılan məlumata görə, Galaxy A seriyasının yeni üzvü Galaxy A16 4G 209,90 avro, Galaxy A16 5G isə 239 avro qiyməti ilə satışa çıxacaq. Hər iki telefon 128 GB yaddaş sahəsi ilə gəlir, lakin RAM həcmi barədə məlumat verilməyib. Müqayisə üçün, keçən ilki Galaxy A15 5G-nin 260 dollar (234 avro), Galaxy A15 4G-nin isə 205 dollara (184 avro) satıldığını qeyd etmək olar.

Galaxy A16 keçən ilin dizaynını qoruyarkən, nisbətən daha incə ekran çərçivələri ilə təqdim ediləcək. Lakin qalın alt çənənin bu il də qorunacağı bildirilir. Plastik gövdəyə sahib bu telefonun çentikli ekran və Mavi Qara, Açıq Yaşıl və Boz rəng seçimləri olacaq.

Bəs Samsung Galaxy A16 5G və A16 4G nələri təklif edəcək?

Əvvəlki hesabatlara görə, Samsung Galaxy A16 5G 6 illik əməliyyat sistemi yeniləməsi dəstəyi ilə gələcək. Öndə 90 Hz yeniləmə sürəti və 800 nit parlaqlıq ilə 6.7 düym FHD+ Super AMOLED Infinity U ekranı olacaq.

Cihazın gücünü Exynos 1330 və ya MediaTek Dimensity 6300 çipsetindən alması, 8 GB-a qədər RAM və 256 GB-a qədər yaddaş sahəsi ilə gəlməsi gözlənilir. Ən son məlumatlara görə, cihaz Android 14 ilə qutudan çıxacaq. Digər tərəfdən, Galaxy A16 4G haqqında çox məlumat olmasa da, Galaxy A15 və A15 5G ilə eyni xüsusiyyətlərə sahib olması mümkündür, yeganə fərq çipsetdə ola bilər.