OpenAI dekabr ayında 100 dəfə daha güclü süni intellektini təqdim etməyi planlaşdırır

Görünür, OpenAI növbəti nəsil süni intellekt modelini dekabr ayında istifadəyə verməyi planlaşdırır. İddialara görə, süni intellekt nəhəngi “Orion” kod adlı modelini təqdim edəcək.

Dünyanın aparıcı süni intellekt araşdırma şirkətlərindən biri olan OpenAI, “Orion” kod adlı yeni nəsil süni intellekt modelini dekabr ayında təqdim etməyi planlaşdırır. Şirkətin üzərində işlədiyi bu model, iki il əvvəl istifadəyə verilən ChatGPT ilə eyni tarixə təsadüf edəcək.

Bu yeni modelin ilk mərhələdə geniş ictimaiyyət üçün əlçatan olmayacağı, yalnız OpenAI-nin yaxın əməkdaşlıq etdiyi bəzi şirkətlərin istifadəsinə veriləcəyi gözlənilir. Orion modelinin, OpenAI-nin əsas investorlarından biri olan Microsoft-un Azure platformasında yerləşdirilməsi üçün hazırlıqların noyabr ayında tamamlanması nəzərdə tutulur.

GPT-4-ün varisi?

Orion modeli GPT-4-ün davamçısı kimi görünsə də, modelin ictimaiyyətə GPT-5 adı ilə təqdim olunub-olunmayacağı hələlik dəqiqləşməyib. OpenAI-nin Yaponiyadakı rəhbəri Tadao Naqasaki-yə görə, Orion-un GPT-4-dən 100 dəfə daha güclü olması gözlənilir. Bu yeni model, sentyabr ayında yayımlanan və “Strawberry” kod adı ilə tanınan o1 məntiq modelindən fərqli olaraq, süni ümumi intellekt (AGI) məqsədinə doğru atılmış daha böyük bir addımı ifadə edir. OpenAI-nin son məqsədi isə zamanla müxtəlif dil modellərini bir araya gətirərək daha geniş funksiyalara malik bir süni intellekt sistemi yaratmaqdır.

Əvvəlki hesabatlarda Orion-un təlim mərhələsində OpenAI-nin o1 modelindən istifadə edərək sintetik məlumatlar yaratdığı bildirilmişdi. Şirkətdaxili mənbənin verdiyi məlumata görə, yeni modelin təlim mərhələsi sentyabr ayında tamamlanıb. OpenAI CEO-su Sam Altman, sosial media platforması X-də “qış bürclərinin yaxın zamanda yüksələcəyini” vurğulayaraq, Orion haqqında ipucu verib.