OpenAI, 500 milyard dollarlıq "Stargate" layihəsini elan etdi

OpenAI, Softbank ilə birgə ABŞ-da 500 milyard dollarlıq  süni intellekt məlumat mərkəzi layihəsinə start verir. Bu nəhəng layihə "Stargate Project" adlanır.

ABŞ-da süni intellekt sahəsində tarixi əhəmiyyətə malik olan bu yeni təşəbbüs OpenAI,  Softbank  və Oracle tərəfindən irəli sürülüb və 500 milyard dollarlıq sərmayə ilə həyata keçiriləcək. Məqsəd süni intellekt üçün məlumat mərkəzi şəbəkəsi qurmaqdır. Layihənin elan edilməsi Masayoşi Son, Sam Altman və Lerri Ellison tərəfindən Donald Trampın dəstəyi ilə Ağ Evdə baş tutdu.

Ən böyük süni intellekt infrastrukturunun qurulması

Mətbuat konfransında Masayoşi Son (Softbank-ın CEO-su), Sam Altman (OpenAI-nın CEO-su) və Lerri Ellison (Oracle-ın qurucusu) layihənin detallarını ictimaiyyətə açıqladılar. Onlar layihənin yalnız Trampın qələbəsi sayəsində reallaşdığını vurğuladılar. Əsas tərəfdaşlar arasında SoftBank, OpenAI, Oracle və MGX yer alır. Layihəyə Masayoşi Son rəhbərlik edəcək.

Arm, Microsoft, Nvidia və Oracle bu layihənin texnoloji partnyorlarıdır. Prosesdə Nvidia-nın AI prosessorları və Oracle-ın bulud infrastrukturu  kritik rola malikdir. İlk mərhələdə 100 milyard dollar dərhal sərf ediləcək. Teksasda artıq inşaat işlərinə başlanıb. Əgər "Stargate" sizə tanış gəlirsə, bu, keçən ilki OpenAI və Microsoft-un 100 milyard dollarlıq superkompüter layihəsindən irəli gəlir.

Trampdan tam dəstək

Layihənin yüz minlərlə iş yeri yaratması və qlobal iqtisadi fayda verməsi gözlənilir. Tramp bu təşəbbüsü "tarixin ən böyük süni intellekt infrastrukturu" adlandıraraq enerji sahəsi də daxil olmaqla sürətli inkişaf üçün fövqəladə fərmanlar imzalayacağını bildirdi.

OpenAI, məlumat mərkəzlərinin yalnız ABŞ-da qurulacağını və tam olaraq OpenAI-nın ehtiyaclarına uyğun dizayn ediləcəyini bəyan etdi. Nvidia və Oracle isə mərkəzlərin idarə olunmasında birbaşa iştirak edəcəklər.

Stargate layihəsi çərçivəsində Microsoft, OpenAI ilə əməkdaşlığını 2030-cu ilə qədər davam etdirəcəyini açıqladı. OpenAI, Microsoft Azure platformasında yeni süni intellekt modelləri inkişaf etdirməyə və bu modelləri xidmətlərə çevirməyə davam edəcək.