Keçən aprel ayında təqdim edilən OnePlus Ace qiymət baxımından çox bəyənildi. Son sızmalara görə, şirkət smartfonun yeni nəsli üzərində işləri başa çatdırmaq üzrədir. “OnePlus”un yeni telefonu “Ace 2”nin demək olar ki, bütün texniki xüsusiyyətləri məşhur tipster Yogesh Brar tərəfindən “Twitter”də paylaşılıb. Paylaşımlara görə, Qualcomm Snapdragon 8+ Gen 1 SoC ilə təchiz ediləcək cihaz 8 GB, 12 GB və 16 GB olmaqla üç fərqli RAM və 128 GB, 216 GB olaraq iki fərqli yaddaş variantı ilə gələ bilər. 6.7 düymlük 1.5K Fluid AMOLED displeyi ilə gələcək OnePlus Ace 2 120Hz ekran yeniləmə sürətinə sahib olacaq. 100 Vt doldurmanı dəstəkləyən 5000 mAh batareyaya sahib olacaq cihazın ön tərəfində 16 meqapiksellik selfi kamerası və arxa tərəfində 50 meqapiksellik Sony IMX890 əsas kamerası olacaq.

Nəhayət, Android 13 əsaslı ColorOS 13 əməliyyat sistemi ilə qutudan çıxması gözlənilən cihazın nə vaxt təqdim ediləcəyi bəlli olmasa da, şayiələr 2023-cü ilin yanvarını göstərir.