Qısa müddətdə unikal dizayn və uyğun qiymət siyasəti ilə Android dünyasında tanınan Nothing, 2025-ci ildə üç yeni ağıllı telefon təqdim etməyə hazırlaşır.
OnePlus şirkətinin həmtəsisçilərindən biri olan Karl Pei, bir neçə il əvvəl OnePlus-dan ayrılaraq Nothing markasını yaratdı. Dizaynı ilə fərqlənən və uyğun qiymətli məhsulları ilə qısa müddətdə populyarlaşan Nothing, 2025-ci ildə üç yeni model tanıda bilər.
Şirkət 2022-ci ildə ilk ağıllı telefonu olan Nothing Phone (1) modelini bazara təqdim etmişdi. Orta səviyyəli, lakin gözoxşayan dizaynı ilə istifadə çilərin diqqətini cəlb etdi. Daha sonra 2023 və 2024-cü illərdə isə Nothing Phone (2) və Nothing Phone (2a) modellərini satışa çıxardı. Görünür, 2025-ci il şirkətin məhsul xəttini daha da genişləndirəcək.
Mobil texnologiya sahəsində sızdırmaları ilə tanınan Yogesh Brar, Nothing şirkətinin 2025-ci ilin ilk yarısında üç fərqli modeli bazara təqdim edəcəyini bildirib. Bu modellərin arasında Nothing Phone 3 və Nothing Phone 3a yer ala bilər. Üçüncü model isə Nothing Phone 3a Plus və ya tamamilə yeni bir model ola bilər.
