M4 MacBook Air modellərinin satışa çıxması üçün geri sayım başladı. Apple, aşağı büdcəli iPad və iPhone SE 4 modellərini elan etməmişdən əvvəl M4 MacBook Air seriyasını təqdim etməyi planlaşdırır.
Son məlumatlara görə, yeni MacBook Air seriyası gözləniləndən daha erkən tanıdılacaq. Xatırladaq ki, M4, M4 Pro və M4 Max prosessorlarına malik olan 14 və 16 düymlük MacBook Pro modellərinin təqdimatı ertələnmişdi. İndi isə bu gözləmə dövrü sona yaxınlaşır. Yeni sızıntılar, M4 MacBook Air seriyasının gələn ilin ilk yarısında təqdim ediləcəyini bildirir.
Bloomberg analitiki Mark Gurman, "Power On" bülletenində, 13 və 15 düymlük M4 MacBook Air modellərinin artıq istehsal prosesində inkişaf etmiş bir mərhələdə olduğunu qeyd edib. Cihazların rəsmi təqdimat tarixi hələ dəqiq açıqlanmasa da, Gurman, iPhone SE 4 və iPad 11 modellərindən daha erkən, yəni yanvar-mart ayları arasında təqdim ediləcəyini iddia edir.
Yeni məlumatlar göstərir ki, MacBook Air modellərinin dizaynında əhəmiyyətli dəyişiklik gözlənilmir. Bununla belə, Apple daha çox texniki təkmilləşdirmələrə diqqət yetirəcək. Yeni M4 MacBook Air modellərində M4 prosessoru, 16 GB RAM və 512 GB yaddaşın standart konfiqurasiya olaraq təqdim edilməsi gözlənilir. Cihaz yenə də fansız soyutma sistemi ilə təchiz olunacaq.
Həmçinin, MacBook Air modellərinin daha rəqabətə davamlı qiymətlə satışa çıxacağı gözlənilir. Məsələn, 14 düymlük M4 MacBook Pro modelinin Amazon-da qiyməti 1.399 dollara qədər düşüb.
