Intel Core Ultra 5 235 Gəlir: Gözlənilən Xüsusiyyətlər

Intel Core i5-14500 modelinin varisi olacaq Arrow Lake-S Core Ultra 5 235 modelinin nəticələri ortaya çıxıb. Bəs orta səviyyəli bu CPU nələri təklif edir? Gəlin, nəticələrə nəzər salaq...

Intel, yaxın həftələrdə yeni nəsil Arrow Lake-S prosessorlarını və onlara uyğun 800 seriyalı ana plataları satışa çıxarmağa hazırlaşır. Daha öncə bu seriyada təqdim olunacaq modellərin təxmini qiymətlərini müzakirə etmişdik. İndi isə Core i5-14500-ün varisi olan Core Ultra 5 235 modeli ortaya çıxıb. Gəlin, bu modelin saat sürəti və digər xüsusiyyətləri haqqında danışaq...

Intel Core Ultra 5 235 üzə çıxdı

Geekbench testlərinə görə Intel Core Ultra 5 235 modeli Lion Cove memarlığı ilə təchiz edilmiş 6 performans və Skymont memarlığı ilə 8 səmərəlilik nüvəsinə malikdir. Müqayisə üçün, Core Ultra 9 285K modeli 8 performans və 16 səmərəlilik nüvəsi ilə məhdudlaşır. Yeni prosessor 4.9-5.0GHz saat sürətinə çata bilir və 65W TDP ilə gəlir.

Test nəticələrinə görə, Arrow Lake-S orta səviyyəli prosessoru Geekbench 6-da tək nüvədə 2.634, çoxnüvəli testdə isə 13.293 bal toplayır. Bu, Core i5-14500 ilə müqayisədə tək nüvədə 3%-lik üstünlük göstərir. Lakin çoxnüvəli performans isə oxşardır. Əlavə edək ki, prosessor Hypertreading dəstəyinə malik deyil, yəni burada kiçik bir yüksəltmədən söhbət gedir.

Daha öncə yayılan məlumatlara görə, Intel Arrow Lake-S prosessorlarının gələn həftə təqdim olunması gözlənilir. Lakin bu təqdimat yalnız K seriyalı modellərə aid olacaq. K olmayan modellər, ehtimal ki, CES 2025-də nümayiş olunacaq.

Intel "Arrow Lake" nələr təklif edir?

Arrow Lake prosessorları haqqında artıq çox şey məlumdur. Bu modellər Lunar Lake prosessorları kimi Lion Cove performans nüvələri və Skymont səmərəlilik nüvələri ilə təchiz olunacaq, lakin yüksək performanslı AI yönümlü NPU dəstəyi ilə fərqlənəcək. Intel Arrow Lake prosessorları Ryzen 9000 seriyasına cavab olaraq çıxarılacaq.