Instagram Reels məzmununda zaman limiti iki dəfə artırıldı

Instagram Reels videoları üçün tətbiq olunan 90 saniyəlik zaman limiti iki dəfə artırılır. Instagram-ın rəhbəri Adam Mosseri bu qərarın istifadəçilərdən gələn rəylər əsasında alındığını açıqlayıb.

Artıq istifadəçilər 3 dəqiqəlik Reels videoları paylaşa biləcəklər. Bu dəyişiklik, istifadəçilərin 90 saniyəlik limiti çox qısa hesab etməsi səbəbilə tətbiq olunur.

Instagram-ın yeni vaxt limiti ilə bağlı Mosserinin paylaşımı belə olub:

"İndi 3 dəqiqəlik Reels videolarını yükləmək mümkündür. Daha əvvəl qısa formatlı videolara fokuslandığımız üçün 90 saniyə limiti qoymuşduq, lakin daha uzun məzmun yaratmaq istəyən istifadəçilərdən bu barədə çoxlu rəy aldıq. Ümid edirəm ki, bu yenilik faydalı olacaq."

Instagram uzun formatlı Reels məzmununa keçməkdə tədricən addımlar atır. 90 saniyəlik limitin tətbiqindən iki il keçdikdən sonra, şirkət indi 3 dəqiqəlik məzmunları daha çox görməyi planlaşdırır. TikTok artıq 2021-ci ildən bu yana bu funksiyanı dəstəkləyir.