Hazırda ən çox satılan Xiaomi və Redmi telefonları!

Xiaomi Qrupunun prezidenti və Redmi şirkətinin baş direktoru Liu Weibing ən çox satılan Xiaomi və Redmi smartfon modellərini açıqlayıb. Təcrübəli menecer bu cihazları elan etməklə yanaşı, onlara nə üçün üstünlük verildiyi barədə də məlumat verib. Weibing bildirib ki, hazırda ən çox satılan smartfonlar Redmi K60 və Xiaomi 13-dür. Şirkətin sorğusunda iştirak edən istifadəçilər qabaqcıl kamera xüsusiyyətlərinə görə Xiaomi 13-ü, yüksək oyun performansına görə isə Redmi K60-ı seçdiklərini bildiriblər.

Bu modellər nə təklif edir?

Redmi K60-ın qiyməti hazırda rəsmi Xiaomi mağazasında 510 manatdan (290 dollar) başlayır. Smartfon 3200 x 1400 piksel təsvir ölçülü 6,67 düymlük OLED displey, 64 MP əsas kamera və 16 MP selfi kamerasına malikdir. Cihaz Snapdragon 8+ Gen 1 prosessoru, 8 GB RAM və 128 GB daxili yaddaşla təklif olunur. O, həmçinin 5500 mAh batareyaya malikdir.

Xiaomi 13-ün başlanğıc qiyməti 880 manatdır (515 dollar). Smartfon 6,36 düymlük AMOLED ekrana malikdir. Cihaz 50 + 10 + 12 MP əsas kamera və 32 MP ön kameraya malikdir. Onun digər xüsusiyyətlərini Snapdragon 8 Gen 2 prosessoru, 8 GB RAM, 128 GB yaddaş və 4500 mAh batareya kimi sadalaya bilərik.