Şirkətlərin süni intellekt yarışı davam edir və onların heç biri bu sahədə geri qalmaq istəmir. Çünki süni intellektin yaxın gələcəyin ən gəlirli biznesi olacağına inanılır. Bununla belə, bəzi Google işçiləri ChatGPT-nin rəqibi kimi təqdim edilən "Bard"dan narazıdırlar. Google əməkdaşları süni intellekt çatbotu Bard üçün “tələsik olunan iş”, “uğursuz” kimi ifadələrindən istifadə edirlər. Bəzi işçilər bu uğursuzluğun səbəbi kimi CEO Sundar Pichaini göstərirlər. Hazırda süni intellekt sahəsində “Google”un ən böyük rəqibinin Microsoft olduğunu deyə bilərik. Çünki Microsoft ChatGPT və onun arxasında duran OpenAI şirkəti ilə çox milyardlıq əməkdaşlığa girib. Şirkət hətta Bing axtarış sisteminə və digər xidmətlərinə ChatGPT əlavə etməyə başlayıb. Digər tərəfdən Google “Microsoft”un ChatGPT dəstəyi ilə Bing-i təqdim etməsindən bir gün əvvəl öz aləti "Bard"ı elan etdi.

Google "Twitter"də Bard üçün demo paylaşdı, lakin sonradan məlum oldu ki, "Bard"ın cavabları yanlışdır. "Bard"ın səhvi ilə bağlı xəbərlər yayılmağa başlayanda "Google"un səhmləri 100 milyard dollar itirdi.