Google Lens video üçün sorğu imkanı təklif edir

Google Lens artıq video çəkib video məzmunu haqqında səsli suallar verməyə imkan verəcək. Səsli axtarış xüsusiyyəti həm də fotolar üçün istifadə oluna bilər.

Bu yeni funksiya bu gündən etibarən Android və iOS üçün Search Labs-da istifadəyə verilir.

Google, ilk olaraq may ayında keçirilən I/O konfransında video axtarışın önizləməsini nümayiş etdirmişdi. Nümunə videoda, akvariumdakı balıqların niyə birlikdə üzdükləri ilə bağlı verilən suala Gemini AI tərəfindən cavab verildiyi göstərilir.

Google-ın mühəndislik üzrə vitse-prezidenti Rajan Patel, süni intellektin videodakı kadrları ardıcıl olaraq anlaya bildiyini və bunun üçün xüsusi Gemini modeli yaratdıqlarını söyləyir. Hələlik videolardakı səslər təyin edilə bilmir, lakin Patel bunun üzərində də işlədiklərini vurğulayır.

Google Lens həmçinin, şəkil axtarış funksiyasına səsli suallar vermə imkanını əlavə edir. Bunun üçün kameranı araşdırmaq istədiyiniz obyektə yönəldib, düyməni basılı saxlamaq kifayətdir. Səsli sorğular Android və iOS üçün qlobal olaraq istifadəyə verilib, lakin hazırda yalnız ingilis dilində mövcuddur.