Fırıldaqçılara qarşı diqqətli olun: Behləşməyin!

Fırıldaqçılıq dövrümüzün bəlasıdır. Onlayn məkanda bundan əziyyət çəkənlərdən biri də elan saytlarıdır, daha doğrusu elan saytlarının istifadəçiləri. Onlar fırıldaqçılığın müxtəlif formaları ilə qarşılaşırlar. Son vaxtlar elan saytlarından məhsul almaq istəyənlərdən beh alıb, “yoxa çıxmaq” ənənəsi yaranıb. Bununla bağlı ətrafda çoxlu şikayətlər var. Belə ki bəzi işbazlar saytlara elan yerləşdirirlər və onu almaq istəyən müştəriləri aldadırlar. Yəni alıcı telefonu, kompüteri və ya smart cihazı bəyənir və almaq istəyir. Qarşı tərəflə əlaqə saxlayanda satıcı alıcının çox olduğunu və beh verməli olduğunu deyir. Həmin şəxs də beh göndərir və hər şey bundan sonra başlayır.

Necə deyərlər, əli ilə verdiyini ayağı ilə axtarır. Tapdığı isə “ Bu nömrəyə zəng çatmır. Telefon ya söndürülüb, ya da...”  Bu vəziyyətlə qarşılaşmamaq üçün birinci növbədə diqqətli olun. İkinci növbədə heç bir halda beh verməyin. Behi adətən tanıdığımız insanlara yəni ən azından mağazası olan yerlərə vermək olar, hansı ki ünvanlarını bilirsiniz. Yolunda getməyən nəsə olanda da gedəcəyiniz ünvan olur. Bu da tam təhlükəsiz deyil, amma təkcə telefonla danışdığınız birinə inanmaqdan daha etibarlıdır.

TelSat.az olaraq ən doğru yolun gedib məhsulu görməyiniz, əgər xoşunuza gəldisə, yerindəcə almaq olduğunu tövsiyə edirik. Başqa variantlarda aldanma faiziniz çoxalır.

Tək bu şikayət deyil. Daha yaradıcı fırıldaq fəndlərini də eşidirik. Özünü alıcı kimi göstərib, kartın şəklini istəyən kim, yerli saytların eynisini yaradıb, satıcının inamını qazanmaq istəyən kim. Özünüzü belə kiberdələduzlardan, işbazlardan qoruyun. Belə şəraitdə elan saytları nə edə bilər? Biz elan saytı olaraq yalnız qaydaların pozulması və ya istifadəçilərin elan üzrə çoxsaylı şikayətləri əsasında həmin elan sahiblərinin şəxsi hesablarını bloklaya bilərik. Bu da istifadəçinin pullarını geri qaytarmır, yeganə yol hüquq mühafizə orqanlarına müraciət etmək olur. Ona görə də beh vermək, kartın şəklini göndərmək kimi üsullardan istifadə etməyin, onu deyənlərə inanmayın.