Fevral ayının 15-dən etibarən fiziki şəxslər tərəfindən şəxsi istifadə məqsədilə ölkəyə gətirilən və gömrük orqanlarında bəyan edilməyən mobil telefonların İMEİ nömrəsi Rəqəmsal İnkişaf və Nəqliyyat Nazirliyi tərəfindən qeydiyyata alınmayacaq.

Edəcəyiniz bəyannamə yazılı, yaxud elektron köşklər, eləcə də e.customs.gov.az portalı və ya "Smart Customs” mobil tətbiqi vasitəsilə elektron qaydada gömrük orqanına təqdim edilə bilər. Xaricdən alıb gətirdiyimiz bütün smartfonları gömrük orqanlarında bəyan etməliyik. Bu qanun 2013-ci ildən qüvvədədir, lakin indi daha ciddi nəzarətlə həyata keçiriləcək. Fevral ayının 15-dən, əgər xaricdən gətirdiyiniz cihazı gömrükdə bəyan edib, rüsumlarını ödəməsiniz (burada artıq IMEI kod bəyan olunmalıdır), həmin cihazı ölkə daxilində IMEI qeydiyyatını həyata keçirə bilməyəcəksiniz. Bununla da qaçaq yolla ölkəyə gətirilib, daha ucuz qiymətə satılan smartfon bazarına ciddi zərbə dəyəcək.  

Qanuna görə hər bir şəxs 800 dollar dəyərinə qədər məhsulu özü ilə ölkəyə rüsumsuz gətirə bilər. Rüsumsuz olsa da bəyan mütləq edilməlidir. Yəni aldığınız smartfon 800 dollardan az belə olsa, gömrükdə bəyan edilməlidir. Yoxsa ölkə daxilində qeydiyyata alınmayacaq.

Xatırladaq ki, Azərbaycan Respublikası Nazirlər Kabinetinin 2013-cü il 14 oktyabr tarixli 305 nömrəli qərarının 1 nömrəli əlavəsinin 9-cu hissəsinə əsasən xaricdən gətirilən mobil telefon cihazları mütləq şəkildə gömrük orqanına bəyan edilməlidir.