DeepSeek, OpenAI məlumatlarını oğurladı? Microsoft araşdırmaya başladı

Süni intellekt dünyasını silkələyən Çinli DeepSeek haqqında araşdırmalar intensivləşir. Microsoft, DeepSeek-ə bağlı bir qrupun OpenAI-ın məlumatlarını icazəsiz əldə edib-etmədiyini araşdırır.

Microsoft və OpenAI, Çin mənşəli süni intellekt şirkəti DeepSeek ilə əlaqəli şəxslərin OpenAI-ın texnologiyası ilə yaradılmış məlumatları qanunsuz yolla əldə edib-etmədiyini araşdırır. Bloomberg News-un hesabatına görə, Microsoft-un kibertəhlükəsizlik mütəxəssisləri ötən payızda, DeepSeek-lə bağlı olduğundan şübhələndikləri bəzi şəxslərin OpenAI-ın API xidmətindən istifadə edərək böyük həcmdə məlumat sızdırdığını müşahidə edib.

DeepSeek və məlumat oğurluğu ittihamları

OpenAI API, proqram tərtibatçılarının və biznes müştərilərinin OpenAI xidmətlərinə çıxışını təmin edən əsas platformadır və şirkət üçün əsas gəlir mənbəyi hesab edilir. Hesabata görə, OpenAI-ın ən böyük investorlarından biri olan Microsoft, şübhəli fəaliyyətlər barədə OpenAI-ı xəbərdar edib.

DeepSeek, Çin bazarında aşağı büdcəli bir süni intellekt həlli təqdim edərək ABŞ-lı rəqiblərinə alternativ olmağı hədəfləyir . Şirkət ötən bazar ertəsi, Apple App Store-da OpenAI-ın ChatGPT-sini geridə qoyaraq böyük marağa səbəb olub və texnologiya səhmlərində kəskin dəyişikliklərə yol açıb.

Ağ Ev-in süni intellekt və kriptovalyuta üzrə məsləhətçisi David Sacks, DeepSeek-in ABŞ-dan intellektual mülkiyyət oğurlamasının mümkün olduğunu deyib. O bildirib ki, “DeepSeek-in burada etdiyi şey, OpenAI modellərindən məlumat çıxarmaqdır və bununla bağlı güclü sübutlar mövcuddur”.

Bloomberg hesabatına cavab olaraq, OpenAI sözçüsü, Çin və digər ölkələrdəki şirkətlərin ABŞ-lı süni intellekt nəhənglərinin texnologiyalarını təqlid etməyə çalışdığını bildirib. Lakin konkret olaraq DeepSeek və ya başqa bir şirkətin adını çəkməyib. Microsoft isə məsələ ilə bağlı şərh verməkdən imtina edib. DeepSeek isə hələ ki, rəsmi açıqlama verməyib.