“Coca-Cola”nın buraxacağı ilk smartfon: ColaPhone

Dünyanın ən köklü və böyük şirkətlərindən biri olan Coca-Cola dünyada ən çox istehlak edilən sərinləşdirici içki brendidir. Şirkət pərəstişkarlarını tamamilə fərqli bazarda yeni məhsulla qarşılamağa hazırlaşır. Deyilənlərə görə, tezliklə ColaPhone adlı yeni smartfon modelini çıxarır. Bu gün ilk dəfə modelin dizaynı sızdırılıb.

"ColaPhone"nın dizaynı necə olacaq?

İndiyə qədər verdiyi proqnozlar və iddiaları ilə adından söz etdirən Ice Universe, bu gün Twitter izləyiciləri üçün diqqət çəkən paylaşım edib. "Coca-Cola"nın smartfon hazırladığını bildirən mənbə sözügedən məhsulun ColaPhone adı ilə satışa çıxarılacağını bildirib. "ColaPhone"un xüsusiyyətləri təəssüf ki, hələlik məlum deyil. Bununla belə, yuxarıdakı render şəklinə baxdıqda, cihazın düzbucaqlı formasında olacağı və arxa tərəfində şaquli yerləşdirilmiş ikili kamera modulu təklif edəcəyi görünür. Üst-üstə yerləşdirilmiş iki böyük ölçülü kamera obyektivini daşıyan telefonun yan tərəfində LED fənəri var.

Render şəklindən belə görünür ki, cihazın arxa tərəfi metal olacaq. Smartfon "Coca-Cola"nın rəmzinə çevrilmiş parlaq qırmızı rəngdədir. Digər tərəfdən, arxa tərəfdə cihazı üfüqi şəkildə örtən Coca-Cola loqosu var. Səs düymələri telefonun sağ tərəfindədir, lakin modelin güc düyməsinin olub-olmayacağı hələlik bəlli deyil.

Xatırladaq ki, bu, "Coca-Cola"nın bazara ilk addımı deyil. Şirkət 2000-ci ilin sonlarında Ericsson ilə mühüm əməkdaşlıq etdi. Ericsson A1018s-in Coca-Cola xüsusi buraxılışı təqdim olunmuşdu, telefonda "Coca-Cola"ya məxsus 60 xüsusi zəng melodiyası var idi. Sözügedən modelə eBay kimi platformalarda kolleksiyaçılar tərəfindən hələ də böyük tələbat var.