Çin nəhəngi Alibaba da ChatGPT-yə rəqib hazırlayır

Çinli Alibaba Group Open AI-nin son dövrə damğasını vuran məşhur ChatGPT çatbotuna bənzər süni intellekt sistemi hazırladığını açıqladı. Şirkətin üzərində işlədiyi çatbotun hazırda daxili sınaq mərhələsində olduğu bildirilir. Alibaba gələcəkdə süni intellektə əsaslanan çatbotu Zoom kimi funksiyalar təklif edən DingTalk kommunikasiya proqramına inteqrasiya edə bilər. Şirkət rəsmiləri hələlik məsələ ilə bağlı şərh verməkdən imtina ediblər. Sadəcə bu açıqlamanı veriblər:

"2017-ci ildə DAMO [Alibaba Tədqiqat İnstitutu] təsis ediləndən bəri biz böyük dil modelləri və məhsuldar süni intellekt kimi qabaqcıl innovasiyalara diqqət yetirmişik. Biz texnoloji lideri olaraq bulud xidmətləri vasitəsilə qabaqcıl texnologiyaların tətbiqlərə inteqrasiyasına sərmayə qoymağa davam edəcəyik.”

ChatGPT son bir ayda dünyada böyük populyarlıq qazandı. Çatbot Microsoft tərəfindən dəstəklənən Open AI tərəfindən yaradılıb. Proqram təminatı nəhəngi 2019-cu ildə layihəyə 1 milyard dollar sərmayə qoyub. O, qarşıdakı bir neçə il ərzində Open AI-ya daha çox sərmayə qoyacağını açıqladı.

Bütün bunlara əlavə olaraq, Microsoft artıq Open AI-dan süni intellekt alqoritmlərini Bing axtarış sistemi və Edge brauzeri kimi məhsullarına inteqrasiya etməyə başlayıb. Bu cəhdlərə qarşı boş dayanmayan Google Bard adlı öz ChatGPT alternativini təqdim etdi.