ChatGPT üçün yerli Windows tətbiqi buraxıldı

OpenAI, bir müddət əvvəl Mac üçün süni intellektlə gücləndirilmiş ChatGPT tətbiqini istifadəyə vermişdi. İndi isə şirkət Microsoft Windows üçün masaüstü tətbiq təqdim edib.

OpenAI, populyar süni intellekt dəstəklənən ChatGPT-nin Windows versiyasını sınaqdan keçirməyə başlayıb. Ancaq bu tətbiq hələlik yalnız ChatGPT Plus, Enterprise, Team və Edu abunəçiləri üçün əlçatandır. Web versiyasına öyrəşmiş istifadəçilər, masaüstü tətbiqində də eyni funksiyaları yerinə yetirə biləcəklər. Bundan əlavə, minimum Windows 10 tələb olunur.

ChatGPT üçün Windows dönəmi

Mac versiyasına bənzər olaraq, Windows üçün inkişaf etdirilən ChatGPT tətbiqi istifadəçilərə ayrı pəncərə açaraq digər proqramların yanında suallarını sürətlə verməyə imkan yaradır. Tətbiq fayl və şəkil yükləməyi dəstəkləyir və OpenAI-nin yeni inkişaf etdirdiyi, "məntiqi düşünmə" qabiliyyətinə malik olan o1 modelinə çıxış imkanı verir. Tətbiqə Alt + Space qısa düyməsi ilə rahatlıqla daxil olmaq mümkündür.

Hələlik sınaq mərhələsində olan Windows üçün ChatGPT tətbiqinin bəzi çatışmazlıqları da var. Tətbiq hələki standart və inkişaf etmiş səs xüsusiyyətlərini, həmçinin Google Drive, Microsoft OneDrive və GPT Builder-də autentifikasiyanı dəstəkləmir. Şirkət bu xüsusiyyətlərin tam versiyada təqdim olunacağını bildirir.

ChatGPT-nin Mac versiyası iyun ayında istifadəyə veriləndə, bir inkişafçı təhlükəsizlik boşluğu aşkarlamışdı. Bu boşluq, söhbətlərin mətn formatında yadda saxlanılması ilə bağlı idi. OpenAI, qısa müddətdə bu problemi həll etdi və yerli olaraq saxlanılan məlumatları şifrələdi. OpenAI, ilin sonuna qədər Windows tətbiqini daha geniş istifadəçi kütləsinə təqdim etməyi planlaşdırır. Hələlik yalnız abunəçilər bu yeniliklərdən yararlana bilirlər.